اغرب من الخيال
و الله و الله و الله الكلام الي مكتوب حصل حرف بحرف و انا متأكده انه محدش حيصدق بس هي دي الحقيقه؟؟
بدون اي مقدمات حدخل في الموضوع على طول اصلي لازم احكي القصه دي لاني لحد دلوقت مش مصدقه انها حصلت
بصو يا ساده يا كرام : كنت قاعده بعد الفطار في رمضان الي قبل الي فات و دق الباب قمت اشوف مين قوم حصل الحوار التالي و انا ورا الباب مافتحتش علشان مش من عادتي اني افتح الباب قبل ما اعرف مين و بصيت من العين السحريه ماشفتش حد
انا : مييييييييييييين؟؟؟
الي على الباب :..................؟
انا تاني بقلق :مييييييييييييييييييييييييييييييييييييييييييييييييييين؟؟؟
الي على الباب : لو سمحتي عايز احمد ( ابو العيال ) ؟
انا : اقولو مين ؟
الي على الباب : اندهيلو بس هو مش عارفني؟؟؟؟؟؟
في سري مش عارفك ؟ يعني ايه!!!!! جريت جوه احمد كان في الحمام قعدت اخبط الحق في حد غريب على الباب عايزك معرفوش و بيقول انك ما بتعرفوش برضه ؟؟ احمد قالي طيب انا جاي ؟؟
المهم احمد فتح الباب قالي مفيش حد انا اترعبت بعدين الجرس رن تاني احمد فتح الباب بعدين قالي انا نازل شويه اصل الشب الي جه عايزني في موضوع و هو مش راضي يدخل ؟؟ عايز نتمشى شويه،انا ما اعرفتش اقول ايه احمد نزل و غاب 4 ساعات كنت انهرت خلاص اصل الراجل كان مريب قوي؟؟
في الفتره دي جوزو دخل شريك في مشروع عائلي صغيرقريب من البيت،ليه بقول كده علشان لما رجع سألتو عن سبب التاخير قالي اصل الشب ده بيقول ان والدو كان جارنا من زمان و هو عارفني و شافني في افتتاح المشروع افتكرني و هو جارنا دلوقتي بس هي دي القصه ؟؟؟؟انا بقه قولت :و قالك الكلام ده في 4 ساعات؟؟ جوزو:لأ هو قعد يحكي عن حياته شويه و نفسونبقى اصحاب علشان هو سكن هنه من كام شهر هوه و مراته و ملوش صحاب كده يعني
انا بقه ولعت و ازاي واحد محترم يخبط على الناس في الليل كده عايز يتعرف ؟
جوزو : ما تكبريش الموضوع ده طيب قوي و بعدين ده راجل محترم
انا : محترم ازاي ؟
ركزو هنا قوويييييييييي
جوزو:ده كان ضابط و شغال مع وزير التخطيط و كان يا حرام في حفله و جه ناس ضربو نار على الوزير قام زق الوزير وجت الرصاصه في دماغه حتى وراني مكانها و تخيلي الرصاصه لسه موجوده الدكتور قالو لوحركناها ممكن تعمل شلل اصلها جنب عصب مهم و بعدين الوزير قالو تحب تشتغل في مكان تاني قام قال سمعت انه في في وزاره التخطيط جهه تابعه للامم المتحده عايز يشتغل فيعا هدفها حمايه مصر من اثار الالغام القديمه الموجوده في العلمين وحماية حدودها و وارني كرنيه مختوم ختم النسر باسمه انو شغال في وزارة التخطيط و معاه طبنجه في جنبه معاه على طول اطمني بقه بلاش قلق مش ممكن بعد ده كله تخافي منه
من غير ما اطول اكتر من كده مرت الايام و استاذ ايهاب افندي (الشاب ) بقه لزقه و انا من اول يوم مش مرتحالو تعرف على العيله و بقه لما ييجي يسأل على احمد ما يلقيهوش يرحلو عند بيت اهله وساعات + كنت ارجع من بره الاقيه في البيت مع احمد و الله بلا مبالغه مش عايزه اقول كل يومعندنا و كان طول الوقت زي خيالنا و وساعات يختفي فجأه يقول اصلي جتلي مأموريه للاسكندريه ومره اختفى اسبوع و بعدين حكا قصه غريبه عن الالغام الي في العلمين و طلعو مش عارف كام لغم و الواحد كلفهم 800 دولار و بعدين اتكتب عن الموضوع ده في الجرايد؟؟و مره جه و فجاه رن الموبيل جري بسرعه و بعدها بشويه كان في طيارات حربيه في الجو و لما رجع قال اصل طلبوه علشان في تعبئه للجيش و ما يقدرش يقول اكتر من كده
و بعد حوالي 9 شهور قال لاحمد انه في و ظيفه محترمه في الوزاره تحب تجرب احمد قالو معنديش مانع و طبعا ايهاب باشا عمل البحر طحينه و انها بقاااااااااااد كده وفي 3شهور منحه لالمانيا علشان يكونو على علم بكل جديد بس عايزين مبلغ 1500 جنيه رسوم دمغات و طلب الوظيفه و كده و حلف انه و لا قرش داخل جيبه و جيجيبلو وصل مختوم ختم النسر مش مهم ادي الفلوس
واحمد كل شويه يسأل حصل ايه يا ايهاب،ايهاب يقول قريب اصل لازم لجنه عليا تتعقد و مش عارف مين مسافر و طول الموضوع قوم البيه لخمنا بحكايه تانيه بابايا من متضررين حرب الخليج و كان ليه تعويض عند الامم المتحده و اتأخر ايهاب من ضمن الكلام عرف القصه دي و قال انا ممكن اساعدكم بس سيبوني كام يوم ادوني رقم التعويض و عشمنا بابا و بعد يومين جه و قال لاحمد ، حماك ليه 123600الف دينار كويتي (شايفين الدقه في الرقم و اضرب في 22و شوف كام؟؟ ) و الموضوع ممكن يتحل في بحر اسبوعين، اسبوعين بسسس و بابا من حرب الخليج 1999 ما شفش اي تقدم في الموضوع يمكن يوضع سره في اضعف خلقه ،ايهاب قال : بس في مشكله ان الراجل الي حيخلص الموضوع عايز40 الف جنيه و الله لو كان عليا انا من عايز حاجه بس مش اختصاصي و اتنو عارفين كل حاجه بتخلص بالفلوس و على فكره قام قال اسم بابا و الرمز البريدي ورقم صندوق البريد بابا ساعتها كان عايش بره مصر احنا صعقنا منين عرف الحاجات دي؟؟؟قام قال ده بس علشان تعرفو اني جاد و جبت المعلومات دي من كمبيوتر الامم المتحده يعني مفيش اصدق من كده طب ياسيدي لما تيجي الفلوس تبقى تاخد الي انت عاوزه طلب عربون بس رفضنا و هو ما لحش حتعلرفى بعدين
زهقتو النهايه بقه :من غير تريقه انا في شهر 8 سافرت عن اهلي و فجاه احمد بعتلي رساله بتقول ايهاب طلع نصاب و اتقبض
عليه بس انا بقه كنت حموت كلمتو ما بيحطش منطق فالي لما تيجي بلاش الاجازه تبوظ
الي حصل ان احمد سمع دوشه و هو خارج بص لقى بكس شرطه تحت بيت ايهاب و فيه ايهاب وشه شوارع راح سال الضابط في ايه قالو مراتو بلغت عنه وقالت انو بينصب على الناس هنا الدنيا لفت باحمد وراح جايبو من هدومو الضابط قالو في ايه احمد قالو ده نصب عليا و حكا للضابط الحكايه كلها ...اتاري ايهاب باشا طلع
اولا : مطلوب في قضيه خطف طفل و مطلوب القبض عليه
ثانيا : الرصاصه الي في راسه كانت و هو في الجيش واحد بينظف البندقيه طلعت غلط و صابتو
ثالثا : مش موظف و لا في الامم التحده و لا حاجه ضارب ختم نسر و كرنيه مزور كبيييييييييييييير
رابعا: الطبنجه الي معاه كان فرد امن في شركه هرب و خد المسدس معاه
خامسا : المعلومات الي حابها عننا يوم افتاح المشروع كان معدي سأل في ايه واحد من الي الموجودين قالو افتتاح مشروع فلان ابن فلان و خد منه شويه معلومات و تبلها
سادسا: المعلومات عن بابا اسمه و الرمز البريدي و كده ايهاب كان عندنا و احمد سابو و دخل يصلي قام البيه المحترم نكش في موبيل احمد و قرأ رساله من بابا فيها عنوانو علشان كنا بنبعتلو حاجات بالنسبه لتعويض الامم المتحده قال جه حقول انا السبب و اذا طول حقول اسباب ؟؟؟
سابعا: المعلومات الي كان بيجبها عن العلمين من على النت ؟؟؟؟؟؟
ثامنا : الموبيل لما رن و مشي بسرعة و بعدها الطيارات و قصه الجيش جت صدفه بحته كان موصي حد يرنلو و لما مشي و شاف الطيارات كان في احتفال او تدريب عادي يومها ضرب عصفورين بحجر و قام مخترع القصه اياها
احمد عرف كل ده منه في القسم و كان ايهاب النصاب بيعيط و هو بيحكي القصه دي
ليه ده كله و ليه بقى كده مش حتصدقو اصلو حب بنت الجيران و اهلها كانو رافضين الجوازه دي قام هرب معاها و الشيطان معاهم و لما رجعو مامتها حبت تستر على البنت قامت مجوزاهم بس فضلت حاقده ، قريب ايهاب كانلو فلوس عند راجل مش راضي يرجعهالو قام خطف ابنه ووداه عند ايهاب بس ايهاب ساعتها كان عندو ضمير لسه مامتش ساب الولد بس الولد اعترف عليه قوم ايه الشرطه قبضت على قريب ايهاب و اعترف على ايهاب علشان بوظ الدنيا قام ايهاب هرب و حماتو قلتلو بعدها حكمو عليك 7 سنين و فضل يهرب من هنا لهنا و كل ما يشتغل يطلبو الفيش يهرب لحد ما اتسدت الحياه ادامه قام نصب على الناس و بعدين عرف انو اتحكم
عليه 3 شهور بس مع وقف التنفيذ بعد الحقيقه ما بانت و حماتو اخترعت القصه بتاعت السبع سنين علشان تنتقم منهعلشان الي عملو في بنتها
بس خلاص ايهاب الان حر طليق بيجاول يرجع الفلوس لاصحابها ادانا 500 جنيه و ما شفناش وشه من ساعتها
اه على فكره هو باع كليته و علشان كده ادى شويه ناس فلوسا و جاب عربيه بالباقي؟؟؟؟؟؟
و الله مش عبط بس حسن نيه اصل الواحد لو شك في الناس كلها مش حيعرف يعيش
posted by ام العيال @ ١٠:٣٧ م
24 Comments:
ايييييييه ده
ده فظييع , طب والله ايهاب ده ياكل دالوقتى فى السيما جامد بدل اشباه الموهوبيين اللى مرشوشيين على دماغنا ومالهمش فى التمثيل والحركات
ربنا يحفظك ويحفظ العيال وابو العيال
روقى اعصابك اهى غمّة وانزاااحت :]
صباحك وردى
http://songs.6arab.com/fayrooz..ya-6air.ram
يا ساتؤ يا رب
هو فيه ناس بالشكل ده
:S
اتنصب علي كتير.لاني حسن النية اوي مع الناس
بعده باحس اني ترب اوي وبادايق من نفسي..بس زي ما قلتي الواحد لو شك في كل واحد مش هايعرف يعيش
أم العيال
حاسه من حكايتك انك طنط الهام اللى فى شقة 17 - يا بنتى ماهو لازم يتنصب عليكو - بعد التدوينة العظيمة دى العالم كله - شرقا و غربا عرف عنكم كل حاجة
بالمناسبة ياموالعيال - أنا أعرف بقى اللى يخلص لكم موضوع بابا ده بجد
هو طالب 35000 بس -
و النبى سلميلى على أحمد و فكريه بيا: قوليله بس خالتى تمرحنه بتاعت الرزبلبن أبو هرمونات - قوليله بس و هتدعيلى
مبروك عالشغل يا لوووولا
و النبى سلامى لبابا
زعروره
و الله يا زعروره القصه دي لو اتعملت فيلم حيكسر الدنيا مش كده
ربنا يخليكي
يالله تجربه و عدت
عروسه النيل
دي يا عروسه عينه و اكيد في بلاوي
مستخبيه اكتر بيتهيألي دول شياطين في عباءه البشر
عربي
انت لسه صغير امتى اتنصب عليك
خد بالك من نفسك
و الحياه دائما بتعلم و بتتدينا
تجربه
خالتي تمرمر
اوت يا تمرمر مش طنطك الهام
بس مفيش مانع ابقى الهام
كلنا الهام
احمد بيشكرك على الرز بلبن
مش كنتي من الاول تقولي على موضوع الهرمونات ده من الاول
لازم تسجيلي الاختراع ده باسمك ليجيجي ايهاب يسرق الفكره دي اصل في حرميه افكار برضه
و بابا بيقولك ما خلاص ضاعت خلاص كل الفرص
شيلينك لعوزه
ان شاء الله ميرسي يا قمر
انا إتنصب عليا كتير وقليل بس زى الفيلم ده ما شفتش ابدا ويا رب محدش يشوف
:)
ايه ده !!!؟
لماح جدا وذكى بس للاسف فى النصب
ربنا يستر ولسه الجوع اللى احنا فيه ده ياما ها يطلع مجرمين
ام العيال
يا نهارى عليكم
دى قصص ايهاب دى لازم تتعمل فيلم سينمائى وهينجح جدا
عارفة يا ام العيال انا اتعلمت حاجة فى الدنيا لما اكون مش مستريحة ناحية حاجة مستحيل مشاعرى تخيب لازم فى الاخر يحصل حاجة
ثقى فى مشاعرك جدا حتى لو الشواهد مش معاكى لكن انتى الاصدق
وربنا يسترها عليكم وعلينا
تحياتى
حنون
و لسه في بلاوي مستخبيه
يا رب ما يوري حد كده
بس الموضوع خلص من شهور طويله هي بقت تجربه لا اكثر
الحمد لله
tota
بس فيلم حيكسر الدنيا و لازم و النبي احمدعز يمثل فيه
و الله انا كنت مش مستريحه له خالص بس قدر ربنا الحمد لله
قوليلي انت البلوج بتاعك مالو مش عارفه ادخل عليه بقالي زمن؟؟؟؟
ان شاء الله خير
:-)
ايه يا ام العيال
كده تشردى لابو العيال كده
:D ههههههههههههه
لا بجد
ذكى جداً
ربنا يحفظكم يا رب
كده تشردى لابو العيال
هههههههههههه
لا بجد بقى
ذكى جدا جدا
ووقع فى ايديه ناس طيبة زيكم
ربنا يحفظكم يا رب
يا ام العيال
مفيش بلوج اساسا
انا من هواةالتعليق ولست مدونة
اشكرك على محاولة الزيارة واول لما الوحى ينزل واقرر ادون هكون سعيدة بزيارتك
تحياتى
و عرفتم تاخدوا منه الفلوس بقى و لا اية؟
حكاية و لا الافلام الهندي
تعلم الواحد ميثقش في اخوه
تمر حنة
هههههههه
لا انا عارفة واحد يخلصها بحلة ورق عنب
----
هم يضحك و هم يبكي
بوست رائع وسرد متميز
انا من اول ما اندمجت مع الوست وساعة ما روحتى تندهدى احمد قولت يمكن على الباب دة عفريت ههههه
ربنا سطر
تحياتى
كلبوزه
هيه ناقصه حضرتك و تمر حنه حتتسلو عليا و الا ايه؟؟؟
ماشي ما تخلصيها تا تمرمر بطبق رز بلين
ههههههههههههههههههههههههههه
tamer
شكرا للزياره
يا ريتو كان عفريت كنا عرفنا نصرفه بس ده طلع شيطان
يالله الحمد
حزورك قريب
كلبوزتي
خدنا 500 جنيه من عينيه
مش عايزين منه حاجه علشان ما تشوف وشه
ده ناصب على ناش باكتر من كده بكتير
احنا اخف الاضرار
الله ..الله ..
أنا عن نفسى ..مصدقك ..أنا برضه أتنصب عليه بس للأسف من ناس أصحابى ..
لكن ما حصلش أنى أمنت لأحد ماعرفوش بالشكل ده ..
ع العموم ..كلامك جميل قوى ...
بس خللوا بالك المرة الجاية ..لأحسن النصبة تكون شديدة
...
أنا كنت فى زيارة لمدونتك وقلت نشوف ...
كل سنة وانت طيبة
أم العيال
ربنا ينجيكي وأنتي وأبو العيال
والحمد لله جت على أد كدا
العزيزه ام العيال
ابعتيها ليوسف شاهين والله تنفع فيلم بدل الهيافه اللي بنشوفعا دلوقتي
اسلوبك جميل اوي في السرد
رجل من غمار الموالي
شفت حسن النيه ما ينفعش
بعد ابه الي اتلسع من الشربه بينفخ بالزبادي
بس ما ينفعش نشك في الناس و الله ولاد الحلال كتير
الحمد لله
حائر في دنيا الله
الحمد لله
ربنا يخليك
و يحميك يا رب
محمد مفيد
يا ريت
بس يوسف شاهين هيقلبها الغاز
و هي مش ناقصه
والله انا عن نفسي لسه مصعوقه من الاحداث معقوله في كده
ميرسي يا قمر
ممكن رقم إيهاب
عشان عاوز اعمل قصة فيلم
أختي ام العيال
وانا باقرا مابقتش عارف اضحك والا اكشر
بس ...ايهاب ده ولد نمرة
يستاهل ارفع له القبعة او العمة احتراما
انا احترم اي نصاب زكي يقدر يضحك عليا
الواد ده عنده مواهب ربنا اعطاها له
سرعة بديهة
تحليل
جاذبية
ربط للاحداث
يعني بصراحة ده كنز وطني
وكل النصابيين
اذكياء جدا
عليه العوض ومنه العوض
واللي يجي في الريس بأشيش
:)
باقولك..
عندي مكنة بتقشر بطاطس جاييالي من ليبيا...
تشتري ؟
When I read this, I said to myself 'only in Egypt can this happen" :)
W E L C O M E T O E g y p t
عصر الهبش و التهبيش و النحت اللي احنا عايشين فيه
هينضح باكتر من ايهاب و اللي خلفوة
عوضك على الله
بس بجد اسلوب السرد جميل اوي
سلعلت كتير لما الواحد يكتب حاجة بتطلع احلى من انه يقولها شفوي
سلامنا لابو العيال
إرسال تعليق
<< Home