الأحد، يونيو 18، 2006

ليه الظلم؟؟؟؟؟؟

ليه لما ربنا يدي واحد غلبان سابقا شويه فلوس و لا سلطه
يتحكم في خلق الله يروح جايب طقم سكرتيرات الي همه
و يجيب موبيل احدث موديل مايعرفش فيه
حاجه بحيث انو مابيعرفش يدوس فين علشان يفتحه اويقفله
و المصيبه يجيب موظفين خريجين جامعات محترمه
بيتكلموا لغات و ولاد ناس قوي
علشان ايه؟؟؟؟؟؟
علشان عقده النقص !!!!! ازاي يعني؟
علشان يبهدلهم ايوه بيهدلهم
عقده النقص الي جواه انو اقل مهم
ما تعلمش و لا شاف دنيا ولسه امبارح
اول لما شاف الميت جنيه اغما عليه من ذهول الموقف
طب ربنا حكمته كده و هو لما كان فقير مش زنب
ولاد الناس انو كان بصعب عليهم و بيدولو هدوم او
يقدمو معونه
يقوم لما ربنا يفتح عليه يبهدلهم بينتقم
علشان يحس انو هو كده احسن منهم
الظلــــــــــــــــــــــــــــــــم
هو دا الظلم و هي دي علامات يوم القيامة
الرسول صلى الله عليه و سلم قال انه من علامات يوم القيامه
بما معناه سوف ياتي على امتي يوم يتطاول فيه العفاة العراه
تخيلو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مش الكل طبعا بس كتير قوي و مجتمعنا مليان
ايه العمل نتنازل علشان نعيش ولا لأ ولأ ولأ
اهلنا معلموناش و صوفو دم قلبهم و علمونا الادب الاول
علشان نتبهدل
علشان بدل من نقول مستر فلان نقول المعلم فلان
بدل من نقول نعم نقول ايه
بدل من نقول حاضر نقول ماشي
و البدلات كتير
انا قلت لأ لأ لأ لأ
انا استقلت اليوم ليه علشان البيه المدير العام
مع شديد الاحترام لجميع المهن و الحرف
كان بيدق مسمار في فيلة واحد خليجي
قوم ايه البورصه ضربت اليوم ده
وكسب اتفائل به و فتحلوا شركه رأس مالها
اكثر من 70 مليون جنيه
و سافر و تركلوا الجمل بما حمل
البيه المدير ما بيعرفش يقرا و لايكتب
و مالوش في الاداره بيعرف يدق المسامسر بس
راكب النهارده 3 عربيات وعندو بودي جاردات
وفيلا ماشاء الله
يقوم بيهدل فينا احنا علشان و لاد ناس
هو دا ذنب
رفضت علشان كرامتي ما بتسمحليش
ازاي اعترض احنا حنخفض الكام ملطوش الي انا بخودهم علشان الميزانيه مخرمه
ال هو عارف ميزانيه دي يعني ايه
واحنا .....كم كلمه كده قعد يحفظ فيهم 3 ايم
وقالهم متلخبطين في الاخر
طيب الاستقاله هي الحل
و تخيلو مكافات نهاية الخدمه كام
مش حتصدقو200 جنيه
طبعا رمتهم في وشو و اديتو دش بس بكلم مين
ماهو واخد على التهزيق من ايام المسمار
عارفين انا حطيت صوره مين؟؟؟؟
دا حنظله رمز الظلم



الاقصى

2 Comments:

At 23:07, Blogger Ahmed Shokeir said...

أم العيال

ماوالواحد ياما دق مسامير ماحصلش أي حاجة ليه ولاحد دفع ولا مليم

حظوظ

وكمان مديرك ده من حظك زي البطيخة بالظبط ، المهم هو خد المتين جنيه ؟

 
At 21:43, Blogger Montana Master Of Love said...

الموضوع بسيط و طبيعي جدا انه لازم يتغير ... كان في مره اصحاب بقالهم 12 سنه مبيفترقوش عن بعض ... كان من حبهم لبعض مكانوش ابدا يفترقوا الا ساعة النوم ... وكمان القدر جمعهم في فصل واحد و في نفس الصف و في نفس المستوي ... حتي ال كان بيتغير كان بيتغير بنفس الطريقه ال اتغيرها التاني ... كانها سيمفونيه جميله بتتعزف علي ارق الاوتار ... واحلي حاجه بقي انهم مكانوش عيال اشقيا ... ولا عمرهم شربوا سيجاره ولا حتي فكروا يجمدوا قلبهم و ( يسترجلوا ) زي ما الشيطان بيقول ويشربوا بيره والحاجات ال زيها ... ياريت علي اد كده وبس دا حتي مكانوش بشجعوا بعض يكلموا بنت ولا يعاكسوا بنوته حلوه ماشيه ف الشارع ... يا سلام علي الايام دي ... ايام حلوه بجد فكرتيني بيها من كام كلمه قرتهم في المقدمه بتاعتك ... وكمان قوتيني ان اكتب ال جوايا من غير ما اخاف لما قريت عشقك وادمانك للقرايه ال بعاني منهم وبدمنهم برضه ...علشان كداانا هكتب ومش هبطل اكتب ان شاء الله و هاخد كلامي هنا كوبي وهعمله بيست في مدونتي المهمله من احتواء كلماتي واحاسيسي المحبوسه ورا اسوار قلبي ... هتكلم و مش هيأس عشان مبسمعش صدا صوتي ... و هقول ال جوايا عشان ارتاح ... انت بتقولي ليه لما ربنا بيدي واحد غلبان سابقا شوية فلوس ولا سلطه يتحكم في خلق الله؟ يروح يجيب طقم سكرتيرات ال همه ويجيب موبايل احدث موديل ميعرفش فيه حاجه ؟!
وكل دا عشان عقدة النقص ال جواه وعشان يبهدلهم وينسي انه في يوم م الايام كان ممكن يفضل اقل منهم وميوصلش حتي لحلم جميل في منامه يطلعه م ال هو فيه !!
الكلام ال هقوله مالوش علاقه بال حصل معاكي يا ام العيال ... بس فيه معاني مرتبطه بال عايز اطلعه من جوايا ... لما الظلم ييجي من حد مكنش صغير وكبر فنسي انه كان صغير فظلم ... دا كان زينا و لسه زينا بس عرف ناس فوق شويه مننا عربيه و نادي و بنت حلوه زي بتوع الافلام الالوان تضحك ضحكه تشد وراها جيش يحرر فلسطين ... بنت مبتتكلمش معاهم لا ما انا قلت من واحنا صغيرين واحنا كدا مبنحبش نعمل كدا ومتربيناش اننا نبقي عيال جريئه وتثبت وتعبر عن اعجابها و يدوا الورد فيس تو فيس مش يرموه من شباك عربيه ولا يدفعوا مرتبهم كله عشان يبعتوا بوكيه ودبدوب Russ من بلد تانيه لحد بنحبه بس مكسوفين منه .
مش عايز اتوه ... العلاقه في كلامي وال مزعلني وماثر فيا لما الحد ال عاش معانا سنين علي حلونا ومرنا وكل الطباع تعتبر واحده و فجأه وبدون اي مقدمات ومن غير ما يدق مسمار يطلع فلوس في البورصه يبعد عننا و يتبري مننا و لما يشوفنا كانها صدفه حلوه وسلام وكل واحد بيروح لحاله ... مش زي زمان لما كنا بنسال كل يوم علي بعضنا ولا نقلب بعض عشان نادي ولا عشان بنت حلوه مجريه وراها الف معجب غيرنا ولا عشان عربيه بجنط سبور و ازاز فامي متظبطه بساوند سيستم منهبات مامي ودادي ... ليه ؟
ليه الواحد بيتغير لما يعرف حد جديد معاه شوية حاجات حلوه في الدنيا وزايله في الاخره؟
ليه واحد يطنش صحبه و يحسسه انه غريب لما يكون معاه ويتعمد انه يحسسه انه مش مرغوب فيه عشان مش بيعرف يظبط العيال ال علي بوابة نادي ولا يلبس ستايل اوي و مبهدل نفسه ومش مهندم اوي و مبيعرفش يمشي علي بروتوكول خلي بالك من كلامك ادام البنات ال معديه دي ؟!!
ليه بقي لما ال باع صحوبية 12 سنه عشان الحاجت التافهه دي يعرف ان صحبه عرف ناس في النادي وبنات بقي يرجع يعدي عليه ويسال عنه ويقوله ايه يا عم انت مبتجيش ليه ؟
ليه بعد ما كان زمان الصداقه دي من كتر ما الناس بيحسدوها وملوا من الحسد علي حلاوتها و نقاوتها و ان مافيش فيها حتي مره واحد جرب و قال كلمه وحشه ولا غلط في حد بقوا يحسدوا نفسهم انهم لسه سوا ومافيش حد فرقهم ولا دنيا ولا بنت ولاظروف و الفلوس ... يطلع كل دا كلام في الهوا و تفرقهم الدنيا لانفه سبب و الظروف و البنات ( مع انهم مبيعملوش معاهم حاجه) والفلوس ( مع انها برضه مش كتيره).
:)
شفتي انا كنت خايف اكتب وعارف ان افكاري مش مترتبه ومش عارف اعبر اوي بس برضه هاخدها كوبي وبيست دلوقتي وزي ما هيا كدا و لو حد فهم حاجه يبقي يقولي ...

 

إرسال تعليق

Links to this post:

إنشاء رابط

<< Home

http://nazweb.jeeran.com/flag.gif
  • tdv,.